ក្រុមហ៊ុន Harley-Davidson បានបន្ដជន្លបញ្ចេញលក់ម៉ូតូអគ្គិសនីរបស់ខ្លួន LiveWire ៤ ឆ្នាំមកហើយ និងទើបតែប្រកាសគម្រោងវិនិយោគបន្ថែមលើម៉ូដែលអគ្គិសនីនៅពិព័រណ៍អ្នកប្រើប្រាស់បច្ចេកវិទ្យាអេឡិចត្រូនិកឆ្នាំ ២០១៩ នៅក្រុងឡាស វេហ្កាស។
ព័ត៌មានលម្អិតពីបច្ចេកវិទ្យាផ្សេងៗនៃម៉ូដែល LiveWire ត្រូវបានបញ្ចេញបន្ដិចម្ដងៗអស់ពេលជាច្រើនខែ។ វារួមមានប្រព័ន្ធហ្វ្រាំងគុណភាពខ្ពស់ Brembo គ្រោងតួដែលអាចកែសម្រួលបានកង់ស្ព័រ Michelin ប្រព័ន្ធជំនួយពេលបត់បែន និងប្រព័ន្ធគ្រប់គ្រងលំនឹងជាដើម។ សរុបមកវាជាម៉ូតូប្រណីតសម្រាប់អភិជន។
សមត្ថភាពថាមពលអគ្គិសនីដែលអាចបរបានចម្ងាយ ១៧៧ គីឡូម៉ែត្រហើយក៏នឹងមានការអភិវឌ្ឍបន្ថែមទៀត។ នេះបើយោងតាមលោក ផូ ចេមស៍ នាយកផ្នែកផែនការប្រចាំក្រុមហ៊ុន Harley-Davidson។
LiveWire ប្រជែងនឹងម៉ូតូអគ្គិសនីនៅលើទីផ្សារគឺ Zero SR ដែលប្រើអាគុយ ១៤,៤ គីឡូវ៉ាត់ម៉ោង និងបរបានចម្ងាយ ១៩៣ គីឡូម៉ែត្រ។
LiveWire មានសន្ទុះពី ០ ទៅ ១០០ គីឡូម៉ែត្រក្នុង ១ ម៉ោងដោយប្រើថិរវេលាត្រឹមតែ ៣,៥ វិនាទី ដែលស្ទុះលឿនជាង Zero SR បន្ដិច។ ម៉ូដែល Zero SR បំពាក់អាគុយ ៥២ គីឡូវ៉ាត់ ១ គ្រឿង ដូច្នេះ LiveWire ទំនងជាប្រើថាមពលខ្ពស់ជាងនេះបន្ដិចដែលបំពាក់នៅត្រង់បរិវេណជង្គង់អ្នកបើកបរ។ ចូរចងចាំថា នេះគឺជាម៉ូតូអគ្គិសនីអូតូដោយមិនចាំបាច់ប្រើអំប្រ៊ីយ៉ា ឬចង្កឹះលេខ។
តម្លៃលក់រាយចំពោះម៉ូដែលម៉ូតូអគ្គិសនីរបស់អាមេរិកដ៏ថ្មីបំផុតត្រូវបានកំណត់ថ្លៃដើមចេញពីរោងចក្រប្រមាណ ២៩ ៨០០ ដុល្លារ៕
